又穿帮了

聯辦駱惠寧探訪的劏房戶徐天民，根據中國媒體《湖南頻道》舊年10月嘅報道，佢自資咗5萬蚊整愛國橫額及標語。亦徐天民曾接受左媒訪問，自稱花費逾十萬積蓄送禮到警
署。

被視為「第二支管治隊伍」、其實更似正式管治隊伍嘅中聯辦主任駱惠寧，噚日透過中聯辦發稿，話佢落區探訪74歲、住小西灣嘅長者吳璧嫻，同深水埗劏房戶徐天民。今日唔少人都議論徐天民真正身分係官媒記者，八方fact check過，原來佢「真身」係接受過官媒訪問嘅護旗手，仲要係曾經「自發」清過連儂牆添。

劏房掛國旗 中聯辦離奇裁走

今日網上流傳一張圖，上半部份就係噚日駱惠寧同徐天民喺劏房傾偈嗰幅圖，下半部就係徐天民喺金紫荊廣場影響，而且仲有個《北京日報》咪牌。於是唔少人都覺得徐天民根本就係官媒記者，仲嘲笑佢做記者做到住劏房。

不過八方就發現，徐天民其實唔係記者。根據內地媒體《湖南頻道》喺去年10月嘅報道，徐天民係嚟自湖南、隨身帶備五星紅旗嘅「護旗手」，喺酒店做飲食主管，報道仲提到佢定期同啲「伙伴」去清連儂牆，又自資咗差不多5萬蚊整愛國橫額及標語。

駱惠寧去到徐天民住嘅劏房探訪當日，徐床邊仲掛住巨幅中華人民共和國國旗，喺條片仲見到，但係中聯辦網頁就好明顯夾硬裁走咗，唔知係咪因為驚徐天民有機會違反國旗法，例如「不得倒掛或者以其他有損國旗尊嚴的方式升掛、使用國旗」呢？最離奇仲係，條訪問片，係無現場聲，除咗吳婆婆第一句，之後都係純音樂再上字，另一種「滅聲」。

「護旗手」真身來自湖南 自資10萬整愛國橫額

其實今日《文匯報》頭版都報道，徐天民至今花咗逾10萬蚊喺愛國活動，另外再賣咗內地層樓，拎幾十萬蚊出嚟買抗疫物資捐去湖南，然後再捐10萬蚊。而喺舊年10月，佢任職嘅酒樓仲擔心受拖累而要佢離職，之後搵唔番飲食業嘅工，要轉行做地盤。

咁計法，徐天民前後拎咗幾十萬蚊出嚟愛國，咁駱惠寧噚日探嘅另一位人士吳璧嫻婆婆所捐嘅11萬算少喇。其他建制派見到未呀？呢啲就係榜樣喇。

至於徐天民有《北京日報》咪牌張相點嚟呢？其實係今年初《北京日報》報道元旦日喺金紫荊廣場嘅升旗禮，徐天民接受《北京日報》訪問時影嘅。